In Neered isch mar kleffer un mar duht scho frieh an Weihnachde denge, Mar iwwerlegt, wie kann ich dann blos was gscheide vorschenge, Ich kann eich helfe, kann eich sare was´d Leit so schätze, nemmet en Kolenner oder e Buch un e CD von de Mundart, so wie mir schwetze. Des isch gut, do kommeder immer prima mit ann, un es daugt vor a Fraa genauso gut wie vor en Mann.

© Martin Bruchmann

Es isch morgens em sechse,
ich kann nemme schlofe.
Gedange komme un gehn.
Ich laaf eloi am Meer entlang,
Schaumflege uff meim Weg,
grad wie en meim Kopf.
De Bodde voll mit leere Muschle,
ich kenntse alle mit Gedange fille.
Ich wach langsam uff,
kaldes Wasser umspielt mein nagiche Fieß.
Komm von meine Gedangeausflüg widder zrick,
genieß die friesche Bries
un dend an die warme Wegglen zum Friehschdick.

© Martin Bruchmann

So en scheene Landrege der duht jetzt gut. Sachde falle die Trepfle en mei Garde. Meine frisch gsetzte Tomade duhd der Setzrege richdich gut.Vor mei Blume die wo ausem Windergarde wieder ens frei komme sinn, isch des die roinschd Wellnessdusche. Mar kanne grad zu gugge wie se ihre Blädder dene Tropfe entgegeschdregge um jo koiner auszulasse, das der ganze Winterschdab wieder runnergwesche werd. Die Brimmele fange a wieder uffzublie, weil mar sagt net umsonschde: „Wennd me net giesch gehe ei wie e Briemele!“ Do hogge an meim Fenschder un gug en de Garde naus. D´Amsle un Schpatze dun en de erschde Pfütze bade. So en warme Rege isch hald a vor die Viecher was scheens. Ich hogg immer noch uff meim Schduhl un gug en de Garde. Ich kann jo drauße nix schaffe bei dem Rege. So en Rege hat hald doch viel gude Seide.

Ich heb mar ausem Keller e scheen kiels Bierle kohlt un genies oifach des scheen nixdu.

Aus de Kiche ruft mei Fraa: „Wie siehds aus, regert immer noch, nor kanschmar en de Kiche helfe abdroggne un en de Schdub emol Ordnung en dei Babiere bringe, drauße kansch jo doch nix mache!“

Orgendlich hats jetzt grad gnung gregert mer mussses  jo net iwwerdreibe. Liewer schalde heit dowet mein Gardeschbrenzer wieder ei.

© Martin Bruchmann

Scheehoit
Kloi bisch, zierlich un zahrt.
Du hasch en feingliedriche, schlange Kerber
un scheene lange Fieß.
Wanne de recht betracht
oigentlich bisch scho e richdiche Scheenhoid.
Du kansch oim de Schloof raube 
un du kansch oim ganz schee uff´d Nerve geh.
Am liebschde dehdede grad drigge wie voriggt
manchmol kendede a grad and Wand batsche.
Noch liewer wär mars wenn garned do wärsch
un wannd me aussaugsch bis uffs Blut. 
Du kansch noch so schee sei,
ich kannde trotzdem net leide,
du bleede Schnook

© Martin Bruchmann

De Frieling isch e scheen Zeit, ich kannen sau gut leide,

du siehschd Nardur, un woisch sie duht jetzt richdich dreibe,

Drunne in de Hoidelburg do bliehe d´Apfelbeem,

alle henge richdich voll es isch gar wunderscheen.

D´Biene sause her un na, zwischedurch a e paar Hummele,

sammle Bliedestab, dun sich ganz gschwinn dummle.

Wenn die Bienle verdich sinn, dann kommt e Fiehlingswindle,

fahrd dann en die Bliedle nei, grad wie e hipfchs Kindle.

Schnee e duds dann rosa weiß, alles isch voll gschdroid,

wo ich des alles gsehe heb, heb uff die Äpfel ich mich gfroid.

© Martin Bruchmann