Liewe Leit,

jetzt isch unser 18. Mundart-Owed a scho widder „Geschichte“. Un alle wo debei ware, ware begoischdert. Mir hawe ein quasi volles Haus mit’eme tolle Publikum g’habt, wo mit viel Lache un klatsche super mit uns uf de Bühn un am Klavier, wie mer so schee neudeutsch sagt, interagiert hen. Alles in allem war des a für uns en wundervoller Owed. Für uns un a für alle wo debei ware. Net zuletscht nadierlich a für de Diakonie-Veroi, die von dem Owed mit’ere Schbendesumm aus Ei’trittsgelder un Bewirtung von z’samme 2.000 Euro profitiere.

Un alle wo net debei ware, wo’s verbasst hen, die sin halt -dir wissets jo schon- wie immer selwer schuld!

Am vergangene Donnerschdag war dann im Neereder Rothaus die offizielle Schbendeüwergab, wo dann unser neier Ortsvorschteher, de Thomas Jäger, noch emol ausdrücklich unser Engagement, sowohl kulturell als a sozial, mit scheene Worte g’würdicht hat. Schließlich hen mir mit denne Vera’schdaldunge von de „Alt-Neereder Schul“ un de Thater-Ufführunge von de evang. Kerchechor-Grupp seit Ende de Neinzicher Johr schon Schbende von fascht 140.000 Euro for soziale Zwecke un Ei’richtunge in Neeret eigsammelt.

Des isch noch des offizielle Bild von de Schbende-Üwergab (do hen se uns im Rothaus an d‘ Wand gschdellt):

Übrichens: Wer noch e Weihnachtsgschenkle für liewe Mensche (des kann mer a selwer sei) braucht:

Unser neier Kolenner für 2025 isch a scho ferdich un kann für 10 Euro beim Martin odder bei mir erworbe werre. Die Frau Schmidt im Schreibwarelädle in Kirchfeld hat a noch e paar Exemplare vorrädich. A vom Verkaufserlös von denne Kolenner geht en Doil widder an de Diakonieveroi.