Liewe Leit,

jetzt isch des neie Johr a schon widder e paar Dag alt un nix hat sich geännert. die Welt isch noch genau so verrückt wie’s letscht Johr (also mol abgsehe von uns: Dem Alt-Neereder Schul Lehrkörper un unsere Schüler nadierlich).

Ich hoff, dir hends trotzdem alle gut agfange un send beim „Neirutsche“ net ausgrutscht, weil des geht manchmol schnell.

Zur Feier von dem neie Jahrzehnt heb ich sogar en neier Cocktail kreiert, die „Neereder Luft“. Der hat uf jeden Fall saugut gschmeckt un wenn der’en nochmache wöllet schreib ich eich a glei noch ’s Rezept dezu:

• 1 Doil Gin
• 1 Doil „Berliner Luft“ (des isch en heller Pfefferminzlikör
• 2 Doil Kräutertee „Birne Limette“ von Rauch.

Des ganze gut vermische un mit gut gekühldem Sekt uffülle. Wenn mer will, kammers noch mit’eme Minzezweigle dekoriere, weil „das Auge trinkt mit“, awer er schmeckt a so.

Un für alle Männer, wo üwer de Johreswechsel krank ’s Bett hen hiede müsse un für ihre Fraue, wo se liebevoll gepflegt hen gebts jetzt noch e kloines Troschtpfläschderle in Form von dem „Männergrippe-Blues“ vom letschde Mundart-Owed (alle annere derfe’s nadierlich a a’höre).

Neie Termine gebts nadierlich des Johr a widder. Zunägscht emol unser neies Theaderschdück vom Martin un mir. Des hat den scheene Titel „Krieg der Sterne“ un werd insgesamt vier mol öffentlich ufgführt. Die Termine sin

• Sonntag, 1. März 2020, 17.00 Uhr
• Samstag, 7. März 2020, 19.00 Uhr
• Sonntag, 8. März 2020, 17.00 Uhr
• Sonntag, 15. März 2020, 17.00 Uhr.

Annere Termine werre noch rechtzeidich bekannt gegewwe.

Wär schee, wenn mer uns an oim von denne Termine mol widder sehe dehde. Bleiwet gsun‘ bis dort na un halded eich dapfer

sagt

de Roland