So en Schbaziergang dorch de Hardtwald kann immer widder inschbirierend sei un die Kreativität fördere.
Dodebei kann dann zum Beischbiel so ebbes entschteh:
Hardtwald Herbscht-Limerick
Mir raschle dorch d‘ Hagsfelder Allee,
em Herbscht gebts do immer was zu seh‘
un wie mer so trotte
dorch die Blädder am Bodde
schdeht fümf Meder vor uns e Reh.
Gottseidank isch’s koi wilde Sau,
den Unnerschied kenne genau.
Un wie mer noch gugge
duht des Reh ganz korz zugge
un verschwindt mit’me Satz em Verhau.
Der Herbschtwin‘ blost sei Bagge uf
un fahrt dorch Beem un Büsch.
Die Sonn schteht morjeds schbäter uf
un Nachts werds doch recht frisch.
Die Rejewolge hengge dief,
-die sin so schwer belade-
un wesche de Sommer-Klärwerksmief
von de Schdrohß un aus’em Garde.
Die Zugvöggel sin uf de Flucht
nach Süd in wärmers Wetter.
De Kolenner leid‘t an Magersucht
un hat bloß noch zwoi Blädder.
Un schtets in derre Johreszeit
Wo Depressione walte‘
Do pfupferts uns, ihr liewe Leit
unsern Mundart-Owed z halde.
Do hole mer de Sommer zrück
Un was sich drin begewe
Un lasse manches schöne Schtück
Vor eierm Ohr uflewe.
Ja, am 16. November isch’s so weit, do isch unser nägschder Mundart-Owed im Gemoindehaus Neered-Nord (Kirchfeldschdrohß 149).
Los geht’s em Siwwene un Ei’lass isch ab de Sechse. For Esse un Trinke isch a g’sorgt un gude Unnerhaldung sowieso.
De Ei’tritt koschd 10 Euro (un geht wie immer voll an de Diakonie-Veroi Neered).
Reserviere könneder telefonisch unner 0721-785776 odder per Mail an „altneerederschul@arcor.de“.
Liewe Leit,
endlich ischs widder so weit un mir von de „Alt-Neereder Schul welle dem übliche Herbschtwedder en Sinn gewwe un mol widder en Mundart-Owed abhalde. ‘s isch inzwische dann scho die achtzehnde Ausgab un es hat sich üwers Johr Oiniges an Schtoff a’g’sammelt wo druf wart endlich mol vorgetrage zu werre.
Mir viere (un nadierlich a die Nutznießer vom Diakonie-Veroi) froie uns scho saumäßich uf e volles Haus mit lauder begoischderde Zuheerende un Klatschende (dir sehet, mir könne dschendere ;-).
Weil sich des beim letschde Mol so bewährt hat, mache mer a desmol koin Vorverkauf. Mer kann jetzt am Samsdag, 16. November ab de Sechse uf gut Glück ins Neereder Gemoindehaus in de Kirchfeldschdrohß 149 komme odder mer isch clever un sichert sich sein Platz vorab telefonisch bei mir unner 0721-785776 (wanne ebber net dehoim sei sott, nemmt die Reservierung a gern mein AB entgege), beim Martin (0721-704600) odder per E-Mail (altneerederschul@arcor.de).
De Ei’tritt koscht wie die ganze letschde Johre 10 Euro glatt un wammer bedenkt, wie inzwische die Inflation zug‘schlage hat, isch des doch saumäßig billich un halwer gschenkt. Wer will -un kann- derf nadierlich gern a meh gewwe, weil jo de gesamte Erlös von derre Vera’schdaldung, a aus de Bewirtung, em Diakonie-Veroi zu gut kommt. Un die könne jeden Cent brauche.
Also, üwerleget net lang un meldet eich a odder vertrauet uf eier Glück un kommet u’a’gmeldt am 16. November oifach so ens Gemoindehaus. Ei’lass isch ab de Sechse, ‘s Programm geht dann em Siwwene los (odder korz denoch, wegger de Glocke!).
Adschee bis dort na
sagt de Roland (Alt-Neereder Schul-Rekdor ehre’halwer)
Un ihr wisset jo: Wer net kommt isch selwer schuld!!!
so hoißt des neie Theaderschdück vom Martin un mir, un ich kann eich verschbreche, mir hen uns extra widder Müh gewwe, ebbes Orndlichs uf die schdaawiche Bühne-Bredder zu bringe.
Die Ufführunge von de Theatergrupp vom Evang. Kirchenchor Neureut Nord (de Martin un ich mache nadierlich a widder mit) finne wie gwohnt im Evang. Gemeindehaus Neureut Nord, Kirchfeldstr. 149 an de folgende Termine schtatt:
Saalöffnung isch Samstags um 18.00 Uhr und sonntags um 15.30 Uhr. E kloine Bewirtung mit Schpeise un Getränke, Sonntags a mit Kaffee un emme Kuchebuffet, gebts nadierlich a.
Karde zum Ei‘hoitspreis von 10 Euro könne für alle Veraschtaltungstermine telefonisch unner 0721-785776 oder 0721-704600 reserviert werre. Per E-Mail kammer sei Kardewünsch a unner altneerederschul@arcor.de a‘melde. Die Karde werre dann am Veraschtaltungstag an de Owedkass ausgewwe. Vorabreservierung werd empfohle.
Korze Inhaltsa‘gab:
Die neie Zeit macht a vor Neeret net halt und so üwerlege die drei Skatkumbel Walter, Herbert un Fritz ihr schmales Daschegeld durch Bier-tastings im Internet ufzubessere. Dodebei isch ihne de Kevin, em Herbert sei Enkel, als Kameramann behilflich. Mit ihre u‘konventionelle Art erreiche se schnell e größere Zahl an „Followern“, was se für en professionelle Agent, Jan van Appeldoorn, interessant macht. Der will für se die Akquise bei verschiedene Brauereie gege e entschbrechende Betoilichung üwernemme.
Heiderose un Sieglinde, die Fraue vom Walter un vom Herbert welle do net Abseits schteh un versuche mit alde „Oma-Rezepte“ en Blog im Internet zu etabliere. Unnerschtützt werre se debei von de Heiderose ihre Nichte Cindy.
Wie des alles ausgeht, wer letschtendlich die Nas vorne hat und was es mit dem gehoimnisvolle Herr Raffke uf sich hat, erfahret dir, wenn dir zu denne o.a. Termine em Neereder Gemoindehaus erscheinet.
Oins isch jedenfalls sicher: Schbaß un Unnerhaltung komme net zu korz un dir verlasset des Gemoindehaus noch dem Schtück mit emme Lächle un dem gude Gfiehl, newwer der Unnerhaldung a noch ebbes Guts gmacht zu hawwe, weil de gesamte Erlös von denne Ufführunge wie immer vollschdändich un ohne Abzieg an soziale Ei‘richtunge in Neeret geht.
Un ich perseenlich deht me ganz bsonners froie, wemmer uns an oim von denne Termine mol widder begegne könnde.
Un widder mol isch Weihnachtszeit,
un widder emol hat’s net gschneit.
De Himmel zoigt sich grau in grau,
de Winder macht scheint’s des Johr blau.
Ganz ohne Froscht un Schnee un Eis:
Weihnachde in trüb schdatts weiß.
Die Kinner finne’s gar net schee.
Die hen sich gfroit ghat uf de Schnee,
ufs Schliddefahre, Schneebäll schmeiße;
ha, uf den Winder könntsch grad sch … elde!
Koin Schneemann sieht mer weit un breit:
O, du trauriche Weihnachtszeit.
Un von drauß‘ vom Walde, do kommt er her,
de Nikolaus, un er ärjert sich sehr,
weil dort üwerahl uf de Tanneschbitze
schdatts goldene Lichtle bloß noch Borkekäffer sitze.
Un des ganze Ugeziffervolk froit sich un lacht:
Der Klimawandel isch doch wie für uns g’macht.
Doch trotzdem lemmer de Kopf net hengge.
Mer muss a mol ans Ugeziffer denke.
Un vielleicht gebts nägscht Johr widder Froscht un Harsch,
un dann isch des Ugeziffer bal‘ widder em Arsch.
In dem Sinn: Frohe Weihnacht un e gudes nei’s Johr,
halded eich dapfer un bleiwet schee klor!
Liewe Leit,
am letschde Samsdag hemmer unsern 17. Mundart-Owed im Neereder Gemoindehaus, wo bis zum letschde Platz bsetzt war, erfolgreich abg’halde. Üwer zwoi Schdunne lang hemmer unser neuschde un allerneuschde Werke präsendiert un des Publikum war dodahl begoischdert. Als kloines Beischbiel anbei des positive Feedback von unsere liewe Freundin un Mundart-Kollegin Judith Rimmelspacher, des „Karlsruher Mädle“:
Laudatio zum Mundartabend der Alt Neereder Schul‘ am Samstag, 26. November 2023 im Gemeindehaus Neureut
Was für ein Gespann – MANNOMANN
ROMAKA -MAROKA – KAROMA
Roland Bruchmann – Martin Bruchmann – Karlheinz Grether,
Klavier mit Simon Eisenlöffel, der
meisterhaft Konzertatmosphäre schafft
Dichtkunst vom Feinsten
zwischen Lachen und Weinen
Haiku und Geschichten
gefühlvolles Dichten
erhellt dunkle Zeiten
lässt Herz und Sinne weiten
An Leib und Seele ward gedacht
zusätzlich allen Freude macht
Auch hierfür herzlich Dankeschön
kulinarisch köstlich anzusehn
Ihr vier habt wahrlich Gottesgaben
an denen wir uns alle laben
Vorfreude aufs Theaterstück
auch hierfür ganz viel großes Glück
Auf bald ihr Dichterdreigespann
mit Klaviator vornedran
Ich kann nur sagen MANNOMANN
Judith Rimmelspacher Karlsruher Autorin
Wenn dir Näheres üwer die Judith erfahre wollt, könne der do gugge: https://www.facebook.com/judith.rimmelspacher
Liewe Leit,
endlich ischs widder so weit. De negschde Mundart-Owed schdeht scho in de Schtartlöcher, de siebzehnde übrigens inzwische scho, un die Idee‘ sin uns immer noch net ausgange un ‘s gebt Schtoff gnung for en ganzer langer Owed.
Mir viere (un nadierlich a die Nutznießende vom Diakonie-Veroi) froie uns scho saumäßich uf e volles Haus mit lauder begoischderde Zuheerende (dir sehet, mir könne dschendere ;-).
Weil sich es beim letschde Mol bewährt hat, mache mer a desmol koin Vorverkauf. Mer kann jetzt am Samsdag, 25. November ab de Sechse uf gut Glück ins Neereder Gemoindehaus in de Kirchfeldschdrohß 149 komme odder mer isch clever un sichert sich sein Platz vorab telefonisch bei mir unner 0721-785776 (wanne ebber net dehoim sei sott, nemmt die Reservierung a gern mein AB entgege), beim Martin (0721-704600) odder per E-Mail (altneerederschul@arcor.de).
De Ei’tritt koscht wie’s letscht Mol 10 Euro glatt un de gesamte Erlös von derre Vera’schdaldung, a aus de Bewirtung, kommt em Diakonie-Veroi zu gut. Un die könne jeden Cent brauche.
Also, üwerleget net lang un meldet eich a odder vertrauet uf eier Glück un kommet u’a’gmeldt am 25. November oifach so ens Gemoindehaus. Ei’lass isch ab de Sechse, ‘s Programm geht dann em Siwwene los (odder korz denoch, wegger de Glocke!).
Adschee bis dort na
sagt de Roland (Alt-Neereder Schul-Rekdor ehre’halwer)
Un ihr wisset jo: Wer net kommt isch selwer schuld!!!
Diesicher Januardag uf’em Friedhof.
Winziche Rejedröpflen in de Luft
schdroife üwer’s Gsicht wie
Schbinnefäde.
Die Beem, troscht- un blattlos,
erhewe die kahle Äscht
wie zum Bede in de Himmel,
während die Blaumoisle
gschäfdich uf de Zweig rumtorne
un mit ihrem ufgregte Getschilp
des gleichmäßiche Brandungsrausche
vom Audoverkehr em Hinnergrund
üwertöne.
Blötzlich reißt de Himmel uff
un e paar Sonneschdrahle
breche aus’em dreggich’graue Gwölk,
schbiggle sich uf glänziche Grabschdoi,
glitzere in de lehmiche Wasserlache
von de Baggerroifeschbur
uf’em Weg.
‘s sieht aus, als könnts noch en scheene Dag gewwe
heit, uf’em Friedhof.
Oifach umwerfend – un wer net debei war, der hat was verbasst!
Das können all diejenigen bestätigen, die an diesem „15. Mundart-Owed“ im fast ausverkauften Saal des evang. Gemeindehauses Neureut-Nord sich von Lachanfällen bis zum stürmischen Applaus (mit Pfiffen und Johlen!!!) wieder mal herrlich amüsierten und vergnügten.
Schon bei der ersten Story vom „Sidolin“ – gleich nach dem musikalischen Eingangsthema von Simon Eisenlöffel und der Begrüßung durch „Rektor“ Roland Bruchmann – kamen die Zuhörerinnen und Zuhörer so richtig in Fahrt. Und mit „Verschnupft“ legte der auch nochmal umgehend nach.
Mit der „Schöpfungsgeschichte 6. Dag“ und „Maskuline Gwichtskontroll“ nahm dann Karlheinz Grether die Herren der Schöpfung aufs Korn und wies auch gleich darauf hin, dass auch die holde Weiblichkeit am Ende der Veranstaltung noch ihr Fett abkriegt. „S‘ Beschde kommt immer am Schluss – wie beim Nachtisch“…
Martin Bruchmann mit seinen beiden Geschichten vom „Kinnergriege Toil 2 un Toil 3“ erzählte als nächster von den Geburtsumständen seiner beiden Zwillingstöchter und auch deren „Geburtswehen“ bei seinen Enkeln im Kreissaal, und wie das Klinikpersonal völlig perplex war und fast vom Glauben abgefallen wäre.
Noch vor der Pause mit den wie immer leckeren „Pausenbrötchen“ mit Getränken des Diakonievereins folgten noch die Beiträge „Oier – de Texschd“ und „Oier – ‚s Gedicht“ von Rektor Roland, und das Gedicht „Blitsch, blatsch“ von Martin (beide Gedichte auch im Mundart-Kolenner 2020 enthalten). Karlheinz Grether ließ sich darüber aus, was aus Geschenken werden kann und was letztendlich dann daraus wird (Noi, noi, noi).
Im nachdenklichen Blog – wobei der Schwerpunkt auf „denken“ liegt – folgten die Beiträge „Owedschtille“ (Roland), „En Deller Erbsworschtsupp“ (Martin) und „Mit allene Sinne“ (Karlheinz).
Die anwesenden Gartenbesitzer fühlten sich nach der Pause angesprochen durch die Geschichte „Garde-Froide“ von Roland Bruchmann, sein Bruder Martin legte nach mit der Geschichte „Ein Bergerlebnis“. Karlheinz Grether rundete diesen Blog mit seinem Beitrag „Reservierter Parkplatz“ ab.
Gejohle, Pfiffe, Fußgetrampel und riesigen Applaus gab es danach beim „Highlight“ des Abends beim „Männergrippe-Blus“ von Rektor Roland zusammen mit Simon Eisenlöffel an der Gitarre. Ein absoluter Spitzen-Vortrag.
Martin Bruchmann mit „Die Quid“ und „Zufriedehoid“ und Karlheinz Grether mit seinen Erfahrungen bei der „völlich vorurteilsfreie Urlaubsplanung“ beendeten den offiziellen Teil des 15. Mundart-Oweds und Simon Eisenlöffel am Klavier legte nochmals das Alt-Neereder SchulThema“ nach.
Die traditionell fest eingeplanten und erwarteten Zugaben der drei mit „Qualidätslyrik“, „Alder Sack“ und der bereits eingangs erwähnte Seitenhieb auf die Frauen „Agebasste Kloiderordnung“ trieb nochmals den Gästen die Lachtränen in die Augen. Und selbstverständlich durfte als allerletztes auch nicht – wie alle Jahre bisher auch – der gespielte Sketch der beiden Bruchmann-Brothers fehlen, diesmal: „Er & Sie uffem Gardebänkle“.
Wie nicht anders zu erwarten war es wieder ein super gelungener Mundart-Owed, der das Publikum spontan zu Aussagen veranlasste, dass man beim 16. Mundart-Owed im nächsten Jahr unbedingt wieder dabei sein will.
Weil: wer net kommt, isch selwer schuld!
jetzt geht’s endlich los!
Wie schon a’gekündicht isch ab heit de Voverkauf für unsern 15. Mundart-Owed eröffent.
Näheres könnet der aus dem Plakat do unnedra entnemme.
So, ich glab, dodemit wär alles gschwätzt. Jetzt hoißts bloß noch: Nix wie na un Karde bsorgt, odder duhnd se wenichschdens vorab bei mir odder beim Martin bschdelle. Weil, dir wisset jo, der friehe Voggel fangt de (friehe) Wurm. Un außerdem:
Wer net kommt isch selwer schuld!!
Adschee bis zum sechzehnde November sagt
de Roland (Rekdor ehre’halwer)
Alt-Neereder Schul 